Ընտրական գործընթացներ և քաղաքացիական մասնակցություն. աշխատարան Վայք համայնքում

Վայոց ձորի մարզի Վայք համայնքում իրականացվեց «REGION. Ընտրական գործընթացների հուսալի իրազեկման համապետական ցանց» ծրագրի հերթական աշխատարանը։ Հանդիպումը վարում էր ծրագրի դասընթացավար, իրավաբան Մարիամ Մկրտչյանը, ում առաջնորդությամբ քննարկվեցին ժողովրդավարական հասարակարգի համար առանցքային մի շարք թեմաներ։

Աշխատարանի օրակարգում ներառված էին քաղաքացիական մասնակցության կարևորությունը, ընտրական իրավունքի սկզբունքներն ու դրանց մատչելիության ապահովումը։ Մասնակիցները հնարավորություն ունեցան համադրել տարածված կարծրատիպերը օրենսդրական փաստերի հետ, ինչպես նաև քննարկել ընտրական իրավախախտումներն ու դրանց դեմ պայքարի արդյունավետ եղանակները։ Առանձնակի անդրադարձ կատարվեց քվեարկության օրվա բոլոր գործընթացներին՝ տեղամասի նախապատրաստումից մինչև արդյունքների ամփոփում։

Հատկանշական է, որ դասընթացին մասնակցում էր բազմազան լսարան՝ մեծահասակներ, երիտասարդներ, Արցախից տեղահանված անձինք և առաջին անգամ ընտրողներ, ինչը նպաստեց փորձի փոխանակմանն ու համակողմանի քննարկմանը։

Աշխատարանն իրականացվում է Եվրոպական միության և German Marshall Fund of the United States — Transatlantic Foundation (GMF TF) -ի ֆինանսական աջակցությամբ։ Բովանդակության ամբողջական պատասխանատվությունը կրում է «ՄԵՆՔ» Լոռու մարզի երիտասարդական ՀԿ-ն, և այն պարտադիր չէ, որ արտահայտի Եվրոպական միության կամ GMF TF-ի տեսակետները։