2025 թվականի նոյեմբերին Գյուլագարակ համայնքում մեկնարկեց «Media-check» փաստերի ստուգման ակումբներ Լոռու մարզում» նախագծի շրջանակներում իրականացվող երկրորդ «ՄեդիաՎիքենդ»-ը։ Օրվա առաջին հատվածում մասնակիցները սովորեցին, թե ինչ է մեդիան և մեդիագրագիտությունը, ինչու է այն կարևոր հասարակության համար և ինչպես է այն ազդում մեր պատկերացումների ու կարծիքների ձևավորման վրա։ Մեդիագրագիտության 5 հիմնական հարցերի միջոցով նրանք զարգացրին քննադատական մտածողություն և սովորեցին տարբերակել կեղծ ու ճիշտ տեղեկատվությունը։
Խմբային աշխատանքի ընթացքում կիրառվեց «Ծառի» մեթոդը․ մասնակիցները վերլուծեցին տեքստեր, բացահայտեցին տեղեկատվության կառուցվածքն ու աղբյուրների հավաստիությունը։ Այս մեթոդը օգնեց նրանց հասկանալ տեղեկատվական շղթաների ձևավորումն ու մեդիայի պատասխանատու օգտագործման դերը։ ՄեդիաՎիքենդի ընթացքում մասնակիցները նաև խաղացին «Մեդիագիտակ» խաղը՝ փորձելով իրենց ուժերը մեդիա գիտելիքների և փաստերի ստուգման հմտությունների մեջ։
Օրվա երկրորդ հատվածում նրանք քննարկեցին փաստերի ստուգման մշակույթը և վստահելի տեղեկատվության ձևավորման մեխանիզմները։ Մասնակիցների խոսքով՝ քննարկված թեմաները չափազանց արդիական էին՝ հատկապես այսօրվա տեղեկատվական հոսքերի պայմաններում, իսկ նման հանդիպումները օգնում են ավելի վստահ կողմնորոշվել մեդիա միջավայրում։
Նախագիծն իրականացվում է «ՄԵՆՔ» Լոռու մարզի երիտասարդական ՀԿ-ի կողմից՝ Կոնրադ Ադենաուեր հիմնադրամի աջակցությամբ՝ «Փաստերի ստուգման ակումբներ» ծրագրի շրջանակներում։
«Երիտասարդները գործելիս․ Հայաստանում երիտասարդների զորեղացման և առաջնորդության խթանման» ծրագիրը համաֆինանսավորվում է Եվրոպական միության և Կոնրադ Ադենաուեր հիմնադրամի կողմից՝ իրականացվելով Վորլդ Վիժն Հայաստանի, Մեդիա նախաձեռնությունների կենտրոնի և Գյումրու «Երիտասարդական նախաձեռնությունների կենտրոն»–ի հետ համատեղ։
