«Ազատ Քվե» դիտորդական առաքելությունը (իրականացված «Երիտասարդները հանուն փոփոխության» ՔՀԶ ՀԿ-ի և «ՄԵՆՔ» Լոռու մարզի երիտասարդական ՀԿ-ի կողմից) հրապարակել է Լոռու մարզի Թումանյան խոշորացված համայնքում 2026 թ․ սեպտեմբերի 27-ին անցկացված ավագանու ընտրությունների կարճաժամկետ դիտորդական առաքելության զեկույցը։ Դիտարկումն իրականացվել է համայնքի 9 ընտրական տեղամասերից 5-ում (Թումանյան քաղաք, Դսեղ, Քարինջ, Լորուտ, Շամուտ)։
Զեկույցում արձանագրված հիմնական խնդիրներն են․
- Ընտրողների ցածր իրազեկվածություն․ Քանի որ ընտրություններին մասնակցում էր միայն մեկ քաղաքական ուժ («Քաղաքացիական պայմանագիր» կուսակցությունը), քվեարկությունն անցկացվել է «կողմ» կամ «դեմ» ձևաչափով։ Ընտրողների մեծ մասը տեղեկացված չէր այս կարգի վերաբերյալ, ինչը տեղամասերում առաջացրել է կուտակումներ, շփոթմունք և դանդաղեցրել քվեարկության ընթացքը։
- ՏԸՀ—ների անդամների պատրաստվածությունն ու քաղաքականացվածությունը․ Արձանագրվել են ընթացակարգային խախտումներ։ Հանձնաժողովների անդամների զգալի մասը համայնքապետարանի կամ ենթակա կազմակերպությունների աշխատակիցներ էին, ովքեր դրսևորել են ընդգծված քաղաքականացված վարքագիծ ի նպաստ գործող համայնքապետի, ինչը առաջացրել է վերահսկվածության ընկալում և շահերի բախում։
- Տեղամասերի ֆիզիկական անմատչելիություն․ Համայնքի 9 տեղամասերից միայն 2-ում է առկա եղել թեքահարթակ (դիտարկված 5 տեղամասերից և ոչ մեկում չի եղել), ինչը սահմանափակել է հաշմանդամություն ունեցող անձանց, տարեցների և տեղաշարժման դժվարություն ունեցողների մասնակցությունը։
Առաջարկություններ․ Առաքելությունը ԿԸՀ-ին և ՏԻՄ-երին առաջարկում է իրականացնել առավել թիրախային իրազեկման արշավներ, բացառել համայնքային ծառայողների ներգրավումը ՏԸՀ-ներում՝ շահերի բախումից խուսափելու համար, և ապահովել տեղամասերի 100% ֆիզիկական մատչելիությունը։
Ամբողջական զեկույցին կարող եք ծանոթանալ կից փաստաթղթում:
