«Media-check» փաստերի ստուգման ակումբներ Լոռու մարզում» ծրագիրն իրականացվել է Տաշիր և Գյուլագարակ համայնքներում։
Ծրագրի նպատակն է՝ խթանել ապատեղեկատվության և մեդիա մանիպուլյացիաների դեմ պայքարը Լոռու մարզի Տաշիր և Գյուլագարակ համայնքներում՝ ստեղծելով փաստերի ստուգման ակումբներ, ձևավորելով համագործակցության նոր հարթակներ, ինչպես նաև զարգացնելով երիտասարդների մեդիագրագիտությունն ու քննադատական մտածողությունը։
Ծրագրի շրջանակներում հասցեագրված հիմնական խնդիրներն ու արդյունքները.
- Փաստերի ստուգման ակումբների հիմնադրում և կարողությունների զարգացում. Ծրագրի շրջանակում երիտասարդների համար ստեղծվել են փաստերի ստուգման ակումբներ։ Ակումբի անդամները մասնակցում են ամենշաբաթյա «ՄեդիաՈւիքենդ»-ների, որտեղ սովորում են գնահատել տեղեկատվության աղբյուրները, տարբերակել կեղծ և հավաստի տեղեկությունները, ինչպես նաև զարգացնել քննադատական մտածողությունը։
- Մեդիաբովանդակության արտադրություն և տարածում. Ուսումնական գործընթացին զուգահեռ՝ մասնակիցները ստեղծում են սեփական մեդիաբովանդակություն՝ հոդվածներ, ֆոտոպատմություններ և տեսանյութեր, որոնք հրապարակվում են կազմակերպության կայքում ու սոցիալական հարթակներում։
- Նորարարական կրթական գործիքների մշակում. Նախագիծը ներառում է կրթական նոր գործիքների մշակում։ Մասնավորապես, կստեղծվի խաղ-քվեստ, որը կօգտագործվի ոչ միայն Տաշիրի և Գյուլագարակի, այլև Լոռու ու հարակից մարզերի երիտասարդների կողմից։ Այս խաղը կօգնի երիտասարդներին ինտերակտիվ ձևաչափով սովորել ապատեղեկատվությունը բացահայտելու մեխանիզմները և մեդիա մանիպուլյացիաների դեմ պայքարի արդյունավետ միջոցները։
- Իրազեկման արշավների իրականացում. Նախատեսվում է իրականացնել սոցիալական մեդիա արշավ՝ մասնակիցների կողմից պատրաստված կարճ տեսանյութերի (reels) միջոցով։ Տեսանյութերը կներկայացնեն մեդիագրագիտության, թվային անվտանգության և մանիպուլյացիոն բովանդակության բացասական ազդեցությունների թեմաները՝ նպաստելով հասարակության ավելի լայն շրջանում իրազեկվածության մակարդակի բարձրացմանը։
«Երիտասարդները գործելիս․ Հայաստանում երիտասարդների զորեղացման և առաջնորդության խթանման» ծրագիրը համաֆինանսավորվում է Եվրոպական միության և Կոնրադ Ադենաուեր հիմնադրամի կողմից՝ իրականացվելով Վորլդ Վիժն Հայաստանի, Մեդիա նախաձեռնությունների կենտրոնի և Գյումրու «Երիտասարդական նախաձեռնությունների կենտրոն»–ի հետ համատեղ։
